മുക്കം: വാഹനമിടിച്ച് ഗുരുതരമായി പരിക്കേറ്റ ഗര്‍ഭിണിയായ പട്ടിക്ക് തുണയായി മുക്കം നഗരസഭാ ചെയര്‍മാനും സന്നദ്ധപ്രവര്‍ത്തകരും. മുക്കം ഇഎംഎസ് ഓഡിറ്റോറിയത്തിനു സമീപം പ്രാണവേദനയാല്‍ പുളയുകയായിരുന്ന പട്ടിയെ നഗരസഭ ചെയര്‍മാന്റെ നേതൃത്വത്തില്‍ രക്ഷിക്കാന്‍ ശ്രമിച്ചെങ്കിലും ശ്രമം വിഫലമായി. മൂന്ന് കുഞ്ഞുങ്ങള്‍ക്ക് ജന്മം നല്‍കിയ ശേഷം പട്ടി മരണത്തിന് കീഴടങ്ങി.
വെള്ളിയാഴ്ച രാത്രിയോടെയാണ് വ്യാപാരികള്‍ മുക്കം ഇഎംഎസ് ഓഡിറ്റോറിയത്തിന് പിന്നില്‍ പട്ടിയുടെ കരച്ചില്‍ കേട്ടത്. ശനിയാഴ്ച രാവിലെയും സമാനമായ രീതിയില്‍ കരച്ചില്‍കേട്ട് പോയാണ് പട്ടിക്കു സമീപം രണ്ട് പട്ടി കുഞ്ഞുങ്ങളെയും കണ്ടത്. വ്യാപാരിയായ അരുണ്‍ലാല്‍ നഗരസഭാ ചെയര്‍മാന്‍ പി.ടി. ബാബുവിനെയും സുഹൃത്തും സന്നദ്ധ പ്രവര്‍ത്തകനുമായ മുക്കം പ്രഭാകരനെയും അറിയിക്കുകയായിരുന്നു. ഉടനെ തന്നെ മുക്കം മൃഗാശുപത്രിയിലെ ഡോക്ടര്‍ കൃഷ്ണ സൂരജിനെ വിവരമറിയിച്ചു. ഇതിനിടെ അരുണ്‍ലാലും പ്രഭാകരനും ഗ്ലൂക്കോസും വെള്ളവും നല്‍കി പട്ടിയെ തിരികെ ജീവിതത്തിലേക്ക് കൊണ്ടുവരാന്‍ ശ്രമിച്ചു. തലയില്‍ തലോടിയും മറ്റും പട്ടിക്ക് ആശ്വാസമേകി. ഇതിനിടെ പട്ടി മൂന്നാമത്തെ കുഞ്ഞിന് ജന്മം നല്‍കി.
ജീവന്‍രക്ഷാ മരുന്നുമായി ഡോക്ടര്‍ എത്തിയപ്പോഴേക്കും പട്ടി ചത്തിരുന്നു. നഗരസഭാ ശുചീകരണത്തൊഴിലാളികളുടെ നേതൃത്വത്തില്‍ പട്ടിയുടെ ജഡം മറവ് ചെയ്തു. മൂന്നു കുഞ്ഞുങ്ങളെയും നഗരസഭാ ചെയര്‍മാന്‍ വെറ്റിനറി ഡോക്ടര്‍ക്ക് കൈമാറി. മുക്കം മൃഗാശുപത്രിയില്‍ എത്തിച്ച കുഞ്ഞുങ്ങളെ ആവശ്യക്കാരെത്തിയാല്‍ ദത്തു നല്‍കുമെന്ന് ഡോക്ടര്‍ പറഞ്ഞു.
The pregnant dog, who was injured by a vehicle, was treated under the leadership of the Chairman of Mukkam Municipality
.jpg)
