കോട്ടൂര്‍: കോട്ടൂര്‍ ഗ്രാമ പഞ്ചായത്തിലെ ഒമ്പതാം വാര്‍ഡിനോട് ഭരണ സമിതി അവഗണന കാണിക്കുന്നുവെന്ന ആരോപണവുമായി യുഡിഎഫ്. പഞ്ചായത്തിന്റെ വികസന പ്രവര്‍ത്തനങ്ങളില്‍ വാര്‍ഡിനെ ബോധപൂര്‍വ്വം തഴയുന്നുവെന്നാണ് മുന്നണി ആരോപിക്കുന്നത്.
അവഗണനയില്‍ പ്രതിഷേധിച്ച് യുഡിഎഫ് വാര്‍ഡ് കമ്മിറ്റിയുടെ നേതൃത്വത്തില്‍ കുന്നുമ്മല്‍ പൊറായില്‍ അങ്ങാടിയില്‍ സായാഹ്ന ധര്‍ണ സംഘടിപ്പിച്ചു. ഒമ്പതാം വാര്‍ഡിലെ സുപ്രധാന റോഡ് നവീകരിക്കുന്നതിന് കരാര്‍ ഒപ്പ് വച്ചിട്ടും ഭരണ സമിതിയുടെ അലംഭാവം കാരണം ജോലികള്‍ നടക്കുന്നില്ലെന്ന് യുഡിഎഫ് ആരോപിച്ചു.
പണി മുടങ്ങുന്നതിനാല്‍ പല നിര്‍മ്മാണ പ്രവൃത്തികളുടെയും ഫണ്ട് മുടങ്ങുന്ന അവസ്ഥയാണുള്ളത്. ഒമ്പതാം വാര്‍ഡിനോടുള്ള അവഗണന ഭരണ സമിതി തുടരുന്ന പക്ഷം കൂടുതല്‍ ശക്തമായ സമര പരിപാടികള്‍ നടത്തുമെന്ന് യുഡിഎഫ് നേതാക്കള്‍ പറഞ്ഞു.
സായാഹ്ന ധര്‍ണ്ണ ബാലുശ്ശേരി ബ്ലോക്ക് പഞ്ചായത്ത് അംഗം ഇ.ടി. ബിനോയ് ഉദ്ഘാടനം ചെയ്തു. കെ.എം. ശശി അധ്യക്ഷനായി. ഗ്രാമ പഞ്ചായത്ത് അംഗങ്ങളായ ഇ. അരവിന്ദാക്ഷന്‍ അതുല്യ കുറ്റിയുള്ളതില്‍, ഷംന, ഗീത. ഉണ്ണി, എം. പോക്കര്‍ കുട്ടി, കെ.കെ. അബൂബക്കര്‍, സിഎച്ച് സുരേന്ദ്രന്‍, സി.കെ. ശാക്കീര്‍ തുടങ്ങിയവര്‍ സംസാരിച്ചു. കെ.ടി. ഷഫീദ് സ്വാഗതവും കെ.എം. സത്യന്‍ നന്ദിയും പറഞ്ഞു.
Kottur Grama Panchayat's ninth ward is being neglected by the governing council: UDF
.jpg)
