നടുവണ്ണൂര് : പാലിയേറ്റിവ് കിടപ്പ് രോഗികള്ക്ക് കൈത്താങ്ങുമായി ബസ്സുടമയും തൊഴിലാളികളും. നടുവണ്ണൂര് - കാവുന്തറ - മേപ്പയൂര് റൂട്ടിലോടുന്ന അച്ചു ബസ്സിന്റെ ബസ്സുടമയും തൊഴിലാളികളുമാണ് പാലിയേറ്റിവ് കിടപ്പ് രോഗികള്ക്ക് സഹായവുമായി രംഗത്തെത്തി മാതൃകയായത്.
പാലിയേറ്റീവ് പ്രവര്ത്തകനായ ബസ്സുടമ എന്.പി. ഷാജി അന്നത്തെ വരുമാനം പൂര്ണ്ണമായും പാലിയേറ്റീവിന് നല്കിയും ജീവനക്കാര് തങ്ങളുടെ വേതനം എടുക്കാതെയും സര്വ്വീസ് നടത്തിയാണ് ഈ മഹത് കര്മ്മത്തില് പങ്കാളിയായത്.
\ബസിന്റെ അന്നത്തെ ഇന്ധന ചെലവുപോലും സ്പോണ്സര് ഷിപ്പിലൂടെയാണ് കണ്ടെത്തിയത്. പാലിയേറ്റീവ് ദിനത്തിലെ വരുമാനമായ 11,600 രൂപ നടൂവണ്ണൂര് ഗ്രാമപഞ്ചായത്തിന്റെയും നടുവണ്ണൂര് കുടുംബാരോഗ്യ കേന്ദ്രത്തിന്റെയും സംയുക്ത സംരംഭമായ നടുവണ്ണൂര് പാലിയേറ്റീവ് കെയര് സൊസൈറ്റിക്ക് കൈമാറി.
പാലിയേറ്റിവ് കെയര് സൊസൈറ്റി ഓഫീസില് നടന്ന ചടങ്ങില് ടി.സി. സുരേന്ദ്രന് ഏറ്റുവാങ്ങി. പി.കെ. നാരായണന് അധ്യക്ഷനായിരുന്നു. സുധീഷ് ചെറുവത്ത്, സി.എം. നാരായണന്, എന്. ആലി, എന്.പി. ഷാജി എന്നിവര് സംസാരിച്ചു.
Bus owner and workers to support bedridden patients in naduvannur